Monday, September 10, 2007

Cool, school aur “hum” - Namakool…

Mummy kehti hain, zindagi khud main ek school hai,

..Hoti hogi..

Na hum us school main apni marzi se gaye the,

na hum yahan apni khushi se aaye hain..

Zabardasti dhakel diya ghar ke badon ne,

kaha ki jao pairon pe khade hoke dikhao..

Bas tabhi se in jhanjhaton main uljhe hain..

~~~~

Na jane kaisa yeh school hai..

Sab hume yahan kehte hain ki hum namakool hain..

Har koi haath main chadi leke padata hai..

Bhool jao, to, jor se maar lagata hai..

Isse to achche, saal main teen baar exam hua karate the..

Kam se kam, garmiyon main chutti to milati thi..

Ab to bas har lamha imtehan hi hote hain,

Aur hamari jaan, pass - fail main uljhi hai..

~~~~

Na to class upar jaati hai,

Na koi degree haath main aati hai,

Mummy kehti hain, tajurba hi tumhari taleem ki pehchaan hai,

Aur har naya safed baal, tumhara inaam hai..

~~~~

Ab to safed baalon se bhi man ghabrata hai,

Jinke hone chahiye, unke to kale hain..

Aur hum kachchi umar se hi safed baalon ka bojh sambhale hain..

~~~~

“Jab safed baal hi kabiliyat ki pehchaan hain, to log unhe kahe rangaye ghoomate hain??”

Mummy ko lagata hai, hum kafi faltu sawaal poochate hain..

~~~~